सिम्प्लेक्स रिडेव्हलपमेंट प्रोजेक्टच्या नावाखाली लोकांची फसवणूक? परवानगी नसतानाही ‘Pre-Launch Investor Booking’ सुरू असल्याचा आरोप
घणसोली, सेक्टर-7 : सिम्प्लेक्स कॉलनी रिडेव्हलपमेंट प्रकल्पाबाबत धक्कादायक माहिती समोर येत असून, आवश्यक कायदेशीर प्रक्रिया पूर्ण न करता आणि संबंधित प्राधिकरणांच्या मंजुरीशिवाय ऑनलाइन जाहिरातीद्वारे गुंतवणूकदारांना आकर्षित करण्याचा प्रयत्न सुरू असल्याचा आरोप स्थानिक रहिवासी व तक्रारदारांनी केला आहे.
मिळालेल्या माहितीनुसार, प्रकल्पासाठी महानगरपालिकेची बांधकाम परवानगी, रेरा नोंदणी तसेच विकासकाची अधिकृत नियुक्ती अद्याप पूर्ण झालेली नसल्याचा दावा करण्यात येत आहे. याशिवाय, सोसायटीच्या 79(A) बैठकीला अनेक सदस्यांनी विरोध दर्शविला असून संबंधित प्राधिकरणांकडे तक्रारीही दाखल करण्यात आल्याची माहिती समोर आली आहे.
अशा परिस्थितीत सोशल मीडियावर “DP Stage Pre-Launch Rate ₹7500 प्रति चौ. फूट” या नावाने जाहिरात करून 2 BHK – 1350 चौ. फूट व 3 BHK – 1950 चौ. फूट फ्लॅट्ससाठी “Early Investor Advantage” आणि “High Appreciation Potential” अशा आकर्षक घोषणांसह बुकिंग सुरू असल्याचे दिसून येत आहे.
स्थानिक नागरिकांच्या मते, प्रकल्पाची सर्व कायदेशीर कागदपत्रे आणि मंजुरी प्रक्रिया पूर्ण होण्यापूर्वीच गुंतवणूकदारांकडून पैसे गोळा करण्याचा प्रयत्न झाल्यास भविष्यात मोठ्या आर्थिक फसवणुकीचा धोका निर्माण होऊ शकतो. त्यामुळे या प्रकरणाची सखोल चौकशी करून संबंधित जाहिरातींची सत्यता तपासण्याची मागणी करण्यात येत आहे.
नागरिकांनीही कोणत्याही प्रकल्पात गुंतवणूक करण्यापूर्वी रेरा नोंदणी, मंजूर बांधकाम आराखडा, विकास करार, महानगरपालिकेची परवानगी आणि इतर आवश्यक कागदपत्रांची खातरजमा करावी, असे आवाहन करण्यात आले आहे.
या प्रकरणी संबंधित प्राधिकरणांनी तातडीने चौकशी करून सत्य परिस्थिती जनतेसमोर आणावी, अशी मागणी जोर धरत आहे.
— Indiancorruption.In
“भ्रष्टाचार, फसवणूक आणि अन्यायाविरुद्ध लढा – जनतेचा आवाज, जनतेसाठी!”
